بسم الله تبارك الله
اللهم ديمها نعمه واحفظها من الزوال
طريقتي في توضيب وتقسيم لحم خروف العيد
لو عجبكم الالبوم لايك كومنت شير
ملحوظه : ده مش شغل جزار .. جوزي وانا اللي بندبح ونوضب بنفسنا في البيت ماشاء الله
#mona_abdelmoneem

بعد ما بندبح الخروف في اتجاه القبله ونسمي عليه طبعا نسلخه من الفرو ونفصل الرجول والرأس عنه ونعلقه بالشكل ده

نفتح بطنه بحرص ونخلي بالنا السكين ميدخلش اوي عشان ميفتحش الكرشه ويخلي ريحة اللحمه كلها مش حلو ويبهدل الدنيا لازم الكرشه تخرج سليمه بالشكل ده ومعاها الممبار ونشيل الغشاء اللي عليها ده اللي هو المنديل وبنضفهم على جمب بعيد عن اللحمه كلها

بيتبقى في البطن بعد ما نشيل الكرشه والممبار الحلويات دي كبده كلاوي قلب فشه مخاصي طحال الكبده والكلاوي والقلب بخدهم جررري واعملهم وهي طازه نفطر بيهم حاجه كده وهم وده فيديو فيه طريقة الكبده البلدي اما الحاجات التانيه بشيلها اعملها طبق مشكل مع كبده بقري بعدين ولو انتم عدد كبير اعمليهم للفطار بالمره شوحي المخاصي مع حتة ليه وملح وفلفل والباقي اسلقيه وقطعيه وشوحيه بعد كده في الليه السايحه

بقطع حتت لحم مخليه صغيره كده من الفخذه ودي اسمها “اوصال” وبستعملها للشوي او للملوخيه باللحمه او لطاجن المرق الصعيدي

بالشكل ده الجزء الرقيق بيتقطع قطع وياسلام عليه في ارضيه حله او طاجن محشي ورق عنب والجزء التخين يتعمل منه الريش المشويه اللي تجنن

هنا بقى اللحم الملبس اللي طلعناه في الاول من اجناب بطن الخروف واي لحم تاني اثناء التوضيب حسينا انه ملبس بزياده فممكن ميتكلش وكل ده مفيهوش عضم خااالص

نفرمه ونحفظه في اكياس نضيفه وانا بوزن كل كيس نص كيلو ووقت الاستخدام تخلطيه مع لحم بقري احمر وتعملي بيه احلى كفته واطعم حواوشي والذ همبرجر وكمان سجق بلدي

وتتحفط في اكياس صغيره ودي تحديدا بتتحجز للقرايب والصحاب الغاليين بالطلب بتتسيح او تستخدم كده في اكلات كتير

لما بحب احفظ اللحم في الفريز بخزنه في اكياس نضيفه منظمه شفافه وبكتب اسم كل صنف على سكوتش كده لانه لما بيتجمد بيبقى كله شكل بعضه وده بيسهل عليا اختار اللي عايزاه بسهوله ومش هوصيكم تاخدوا من كل القطعيات الحلوه دي في لحمة الاضحيه دي اكتر حاجه تخلي اللحمه زي السكر والاكل كله مليان بركه ربنا يتقبل مننا جميعا . شكرا ليكم وكل سنه وانتم طيبين وعيد اضحى مبارك على الامه الاسلاميه في كل مكان لو عجبكم الالبوم لايك كومنت شير