وصفات شهيه

بعد ما بندبح الخروف في اتجاه القبله ونسمي عليه طبعا نسلخه من الفرو ونفصل الرجول والرأس عنه ونعلقه بالشكل ده

بنفصل الليه ونشيلها على جنب كل جزء بقطعه بشيله بعيد عن الهوا والشمس عشان احافظ على نظافته

نفصل الزنذين او الاكتاف

نفتح بطنه بحرص ونخلي بالنا السكين ميدخلش اوي عشان ميفتحش الكرشه ويخلي ريحة اللحمه كلها مش حلو ويبهدل الدنيا لازم الكرشه تخرج سليمه بالشكل ده ومعاها الممبار ونشيل الغشاء اللي عليها ده اللي هو المنديل وبنضفهم على جمب بعيد عن اللحمه كلها

وده شكل المنديل وطبعا بيتعمل بيه الذ واطعم طرب

بيتبقى في البطن بعد ما نشيل الكرشه والممبار الحلويات دي كبده كلاوي قلب فشه مخاصي طحال الكبده والكلاوي والقلب بخدهم جررري واعملهم وهي طازه نفطر بيهم حاجه كده وهم وده فيديو فيه طريقة الكبده البلدي اما الحاجات التانيه بشيلها اعملها طبق مشكل مع كبده بقري بعدين ولو انتم عدد كبير اعمليهم للفطار بالمره شوحي المخاصي مع حتة ليه وملح وفلفل والباقي اسلقيه وقطعيه وشوحيه بعد كده في الليه السايحه

وده شكل الخروف بعد ما طلعنا الحاجات دي كلها

بقطع اللحم اللي في الجوانب وحوالين القفص الصدري كله واشيله على جنب

وده شكله بعد ما شيلنا الاجناب كلها

بنفصل الاضلاع كامله ونسيب السلسله كلها بالشكل ده

ده شكل الاضلاع

وكده بعد ما شلناها اتبقى الرقبه بالسلسله كلها والافخاد

بفصل الرقبه مع سلسلة الضهر كده

والفخدين تمام وندخل بقى نشتغل ونوضب اللحمه

ده الخروف كله متقطع

سلسلة الضهر والرقبه احلى طعم لحم في الخروف ودي تتقطع وتتسلق لاحلى فتة اول يوم العيد

شكلها لما اتقطعت

الزند بشيل الموزه منه لوحدها تعمل احلى فتة موزه او طاجن باميه وغيره وغيره والزند بقطعه قطع

الزند او الفخذه تسبيها زي ما هي لوهتعملي عزومه على فخده ضاني روستو مثلا

او تتقطع بالعضم برضو كده وتسبي الجزء الكبير وتخليه من العضم ممكن يتعمل محشية رز بالخلطه او محاشي

بقطع حتت لحم مخليه صغيره كده من الفخذه ودي اسمها “اوصال” وبستعملها للشوي او للملوخيه باللحمه او لطاجن المرق الصعيدي

نيجي بقى للاضلاع زي ما هي كده تتقطع نصين بالطول

بالشكل ده الجزء الرقيق بيتقطع قطع وياسلام عليه في ارضيه حله او طاجن محشي ورق عنب والجزء التخين يتعمل منه الريش المشويه اللي تجنن

ده شكل الاضلاع والريش

المنديل اللي طلعناه في الاول نقطعه مربعات كده تحضيرا للطرب ونخزنه في اكياس

هنا بقى اللحم الملبس اللي طلعناه في الاول من اجناب بطن الخروف واي لحم تاني اثناء التوضيب حسينا انه ملبس بزياده فممكن ميتكلش وكل ده مفيهوش عضم خااالص

نفرمه ونحفظه في اكياس نضيفه وانا بوزن كل كيس نص كيلو ووقت الاستخدام تخلطيه مع لحم بقري احمر وتعملي بيه احلى كفته واطعم حواوشي والذ همبرجر وكمان سجق بلدي

الليه اللي شلناها في الاول بنقطعها مكعبات كده

بنفرمها ناعم برضو

وتتحفط في اكياس صغيره ودي تحديدا بتتحجز للقرايب والصحاب الغاليين بالطلب بتتسيح او تستخدم كده في اكلات كتير

لما بحب احفظ اللحم في الفريز بخزنه في اكياس نضيفه منظمه شفافه وبكتب اسم كل صنف على سكوتش كده لانه لما بيتجمد بيبقى كله شكل بعضه وده بيسهل عليا اختار اللي عايزاه بسهوله ومش هوصيكم تاخدوا من كل القطعيات الحلوه دي في لحمة الاضحيه دي اكتر حاجه تخلي اللحمه زي السكر والاكل كله مليان بركه ربنا يتقبل مننا جميعا . شكرا ليكم وكل سنه وانتم طيبين وعيد اضحى مبارك على الامه الاسلاميه في كل مكان لو عجبكم الالبوم لايك كومنت شير