وصفات شهيه

طبعا كلنا عارفين ان المنظفات بتصرف كتير دا غير انها كلها كيماويات 

الوصفة دي طبيعية 100% وهتشوفي هتعمل ايه وهتوفري قد ايه ..أكترمن 15 استعمال

البرطمان اللي في الصورة دا عمل معايا بخاخة ونص

المكونات :

زجاجة خل ..ب 2جنيه هي دي التكلفة 

قشر برتقال أو يوسفي أو الإتنين

ليمون بعد مايتعصر 

عصير نص ليمونة

زيت عطري بأي رائحة تحبيها (اختياري) بس الحاجات اللي هتستعملوها في المطبخ بلاش زيت عطري عشان الاكل

طبعا كلنا عارفين قد ايه الخل والحمضيات بتنضف وبتطهر كمان حتى هتلاقو على معظم المنظفات انها بالليمون 

الطريقة:

هنحط القشر والليمون في برطمان وهنغطيهم بالخل لازم كل القشر يتغطى بيه

هنسيبهم في البرطمان لمدة من 10-15 يوم

هنصفي الخليط 

السائل اللي نزل دا احتفظو بشوية منه وهو مركز كده والباقي هتعايروه بالكوب 

الكوب الواحد هنضيف قده كوب ماء ونحطهم في بخاخة 

وكل مابرطمان يتملي اعملي برطمان غيرو مترميش القشر وممكن تحتفظي بشوية قشر في كيس في الثلاجة لحد ماتجمعي شوية وتحطيهم في الثلاجة 

الاستخدامات :

1-تلميع الزجاح والمرايا ..تحفة بجد من أول مرة المرايا هتلمع وبكده استغنيتي عن ملمع زجاج 

2-تنظيف الرخامة 

3-مسح الأرضيات.وتلميعها .هتاخدو شوية من السائل المركز تحطوه في ماء المسح ..كده استغنيتي عن الديتول لان زي ماقولنا الخل والحمضيات بيطهرو

4-تلميع الخشب..برضو هتحطو السائل المركز في بخاخة وتمسحو بيه الخشب وكده استغنيتي عن ملمع الخشب

5-تنظيف الحمام ..هتاخدو من المركز دا وتحطو معاه شوية  مسحوق عادي وشوية سائل غسيل الأطباق وتخففوه بشوية ميه وتمسحو كل حتة في الحمام بالسلكة هتلاقي الأرضية كمان بتلمع

6-مسح الأجهزة الكهربائية 

7-مسح الكمبيوتر والموبايل والتليفزيون

8-تنظيف الثلاجة ..انا بلاقي بخاخات مخصوص لتنظيف الثلاجة طب وليه وكمان مفيش تعب خلاص هتبخي بالبخاخة وتمسحي بحتة قماشة وبس

9-تنظيف الميكرويف ..زي الثلاجة برضو

10-حطي منه في سائل غسيل الاطباق هيديكي لمعة ومش هيبوظ الإيد لان فيه ليمون 

11-تنظيف المراوح 

12-تنظيف النجف وشوفي بقا لما تبقي حاطة الزيت العطري معاها وتمسحي اللمبات كمان كل ماتقيد الريحة هتطلع 

13-لو عندك حلة شايطة حطي فيها ميه وشوية من سائل الاطباق وشوية من الخلطة دي وسيبيها تغلي عالنار

14-مسح البوتجاز 

15- اي حاجه عندك ليها ريحة وعايزة تضيعيها اغسليها بالخلطة دي لان الخل بيضيع أي ريحة مثلا المطحنة والعلب البلاستيك مكان الاكل وسوري جردل الزبالة 

انتو بقا دورو هتلاقو ليها استخدامات تانية وكل واحدة تقولنا استخدمتها في ايه تاني